خرۆکەی زەوی لەناو هەموو تۆپەهەسارەکانی گەردوون، پڕئاژاوەتر و سەربەگێچەڵەترە.لەبەرئەوەی گیانلەبەرێک بەناوی مرۆڤ لەوێدا دەژی وهەرچی ئاژاوە و پیاوەتی وفیزودەمارە لەناو جەرگەی ئەوخڕۆکەدا روودەدا .
هەسارەکانی دیکەی گەردوون لەچاو زەوی یان چۆڵن و بۆژیان نابن یان نەزانراوە کێیان تێدا دەژی.گۆیا گەردوون لەسەربارودۆخ و بیرو فکری زەوی دەخولێتەوە و هەرچی رووداو و کارەساتە دەبێ تۆوەکەی لێرەدا بچەقێ و هەرلێرەش گەشەو نەشە بکا.
مرۆڤی لێقەوماو وئەسیری فکرو بیری خۆی و هاورگەزەکانی ،لەوەتی سەری لەمنداڵدانی دایکی دەرهێناوە و چاوی پشکووتوە پێموانیە قەت لوێچێک ئاوی فێنکی خواردبێتەوە و پاروەنانێکی بەئاسوودەیی ڕۆدابێ و چرکەساتێکیش حەسابێتەوە.
تۆبڵێی کاروانی ئەوژیانە پڕچەرمەسەرە کۆتایێکی هەبێ؟ئایامرۆڤ هەروەکوو گۆی زەوی کە خڕە و لەوێستان ناکەوێ حەسانەوەی بۆدانراوە؟دەبێ لە پرۆگرام و داتای مرۆڤ،چەمکێک بەناوی وچاندان وچاولێکنان چێنرابێ یان تەنیا هەڵسووڕان؟تۆبڵێی مرۆڤ ونبوێکی ڕاستەقینەی هەبێ و کە ئەو لەنەهامەتی ڕزگارکا؟
گەلێک جار ئەوپرسیار گەلەهێندە مێشک دەکۆڵن و بەناخی دا ڕۆدەچن کەمرۆڤ گومان لە نەخشەی بوون و مرۆڤایەتی وداهاتوو و ژیانی دەکاتەوە و سەری گێژدەخوا وەک گەردوون خول دەخوا.
باشترین سەنەد و بەڵگەی ئەو جۆرە بیرۆکانە و تێهەڵچوونە فکریانە، لاپەڕەکانی مێژوون و ئەوزانیاریانەن کە وەدەست هاتوون و بەدەستی خودی مرۆف خەزن کراون.
هێندێک لەبیرمەندان و زانایان ،پێیان وایە کە ڕەچەڵەکی مرۆڤ دەگەڕێتەوە سەر مەیموون ئەومرۆڤە بەستەزمانەی کەخۆبە هەموو دونیاناگۆرێتەوە دەیکەنە نەوە و نەتیجەی باوکە مەیموون و بەزۆری و بەحوکمی DNA وهێندێک بەڵگەی ناتەواوی عیلمی، دیان هەوێ بیسەلمێنن کەباب و کاڵمان هەرمەیموونە و بەدواداچوونی ناوێ.
ئەوان دەڵێن بەوبەڵگەیە مرۆڤ لەهەموو کێشەدەروونیەکان و ناکۆکی و نابەرابەری رزگاری دەبێ پەرەسەندنی ئەو بیرۆکەیەش بۆتە هۆی سەرو گوێلاک کوتان و تۆمەتبارکردنی یەکتر.
تاقمێکی دیکە لەو بەشەرەماڵوێرانە ،ئەوبیرۆکەیە بەرپرچ دەدەنەوە ولایان وایە کەمرۆڤ بێ ڕەچەڵەکە و بەپێی تەقینەوەیەک دونیا و بەشەر وێنەی کارگ سەریان هەڵدا وهاتنە سەردونیا و ئەوهەموو دام و دەزگا و بوونەوەرە بێ باب و باپیر،لەپڕهاتنە دی.
ئەوتاقمەش فکرو بیری گەلێک بیرمەندو زانا و ڕەشەڵۆکیان بەخۆوە سەرقاڵ کردوە و وادەزانن گۆڕەپانی خوشبەختیان بۆمرۆڤ وەدەست هێناوە.
لقێکی سێهەمیش بەناو ئایینە ئاسمانیەکان،لایان وایە کە نەخێر مرۆڤ ریزدارە و نابێ وناکرێ ڕەگەزی مەیموون لەناخی مرۆڤدا هەبێ و عەقلیش نایسەلمێنێ کە بەتەقینەوەیەکی هەوانته وەدی هاتبێ بەڵکوو لە ڕەچەڵەکێکی بنیادەم بەناوی باوکە ئادەم و دایکە حەوا سەریان هەڵداوە و بوونە سەرتۆپی گیانلەبەران.
لەوەتا مێژوو هەیە چەندەها رێبازومەکتەبی جۆراوجۆر بە بەهەوێنی عاسمانی و زەوینی سەریان هەڵداوە هەموو پێیان وایە لەلایەن خواوە ئەرکیان پێسپیردراوە و هاتوون ئاوساری بەڕەڵا و پساوی مرۆڤی سەرلێشێواو، بگرنەدەست و لەهەڵدێران و سەرەنگرێیی ڕزگاری کەن.
جا خۆشیەکەی لەوەیدایە بەرێبازەئاسمانیەکان و مەکتەبە دەستکردەکان و پسپۆڕەکانەوە هەرهەموویان گومانیان وایه کە حیکمەت و لێزانی وجوامێری و پیاوەتی، وتەنیا لەلای ئەوانە.
درووشمی هەرهەمووشیان ئازادی و رەهایی و مرۆڤایەتی و یەکسانی و خۆشبەختی مرۆڤە وتەنانەت تەوەرو مانای ئەودرووشمانەش لەناو هەرکامیاندا جیاوازی هەیە وبەپێی زەین و هەڵوێست و لێکدانەوەی خۆیان خوێندنەوەی بۆدەکەن .
پاوان خوازی ئەولایەنانە وای کردوە کە جۆرێک دیکتاتۆری فکری و خۆبەزلزانی و درۆزن بێتەکایه وبەرهەمی فکری یەکتر بەکەم بگرن وبناغەی مەکتەبێکی بەنێوێ بێ ڕێزی و بێ حورمەتی دانێن و بەجێگای سەقامگیری سوڵح و پێکەوەژیان،نەوەی بنیادەم دژی یەکترڕاست کەنەوە و تۆوی ئاژاوە و دووبەرەکایەتی بچێنن.
بەڵام لەڕاستیدا،بەستێن وچەمکی پیاوەتی و جوامێری و ئازادی و برایەتی گەلان زۆرلەوەبەرزترو بەرینترە کە هەرکەسە بۆ خۆی داوای دەکا.
ریشەی حیکمەت و زانایی و مرۆڤ دۆستی لەناوتەواوی گەلاندا بوونی هەیە و تایبەتی هیچ فکرو ریبازێک نیە و کەس ناتوانی بەموڵک و ماڵی خۆی بزانێ و دەستی بەسەرداگرێ.ئێستاو ئێستاشە بلێمەتەکانمان و رێبازەکان و دینەکان پێکەوە لەسەر ڕێگاو شوێنی بەرەو رزگاری ئینسان ساغ نەبوونەوە.
بەڵام لەوبەینەدا دەمێنێتەوەمرۆڤی سەرلێشێواوو لەقوڕچەقیو،کەسەدان رایەڵ و پۆ و دەستی بەرەو درێژکراوە ولایەلایەی ئازادی و ڕزگاری بۆ دەڵێنەوە.
ڕۆژبەڕۆژ، ماڵ و دڵی هەژار هەرخاپوورتردەبێ و کۆشک و قەسرەکانیش هەرئاوەدانتر و گیرفانی دەوڵەمەندەکانیش هەر پڕتروهێزو چەکی کاربەدەستانیش هەر کوشەندەتر دەبێ.
لەوەتی ئەوگەردوونە لەگەڕدایە مرۆڤی تێداخولدەخوا بێجگە لەسەرەگێژە و هەڵسووڕان بەدەوری خۆی چی پێنەبڕاوە .
هەرلەدووی چۆڕێک ژیانێکی خۆش و شنەبایەکی برایەتی و
یەکسانییه ونایگاتێ!
کێ دەیگەیێنێ و چۆن دەگاتێ و کەی دەیگاتێ، مەتڵێکە کە هەتا ئەو چاخەی ئێمەش کەس هەڵی نەهێناوە!
جەهانگیربابایی ـ سەردەشت ـ گەلاوێژی ۹۹
