ژیان، وشەیەکی هێندە شیرین و پڕمانایە کە بۆتە هۆی رازانەوە و بابەت و سەردێڕی سەدان کتێب ودەسپێکی قسەی سەرزاری پسپۆڕان و زانایان.
هێندێک وشە ، نەزۆک و بێ ناوەرۆک و.بێ لەق و پۆن.وەک گوڵێکی کەم تەمەن، پاش ماوەیەک شین دەبن و سیس هەڵدەگەڕێن.
بەڵام وشەگەلێکیش هەن، کە ریشەو بنچکیان لە عەرز ، ڕۆچوە و لەقیشیان عاسمانی شەق کردوە.
وشەی ژیان، لەو وشە ئاودارو بەتامانەیە کە بەدرێژایی مێژوو، لەگەڵ ئینسان بوە و هەردەم لە گشانەوە دایە.
کەلیمەی ژیان، کاتێک جوانترو ڕازاوەتر دەبێ کە لەناوجەرگەی کۆمەڵ و گەلاندا دەڕوێ و چەقەرە دەدا. ئەگەر وشەی (پێکەوە) بەژیان بلکێ دەبنە یەک دەستە خوشک و هاوەڵ. ئەوجار( پێکەوەژیان) دەخوڵقێ وخۆری کۆمەڵگا هەڵدێ.
پێکەوەژیان و کۆمەڵگا ودونیاو هەرمان و ئاوەدانی و گەشانەوە، بەسەرێکەوەدەبنە پێخۆری مرۆڤ و ژیان دەخەمڵێنن.
لەوەتی مێژوو سەری هەڵداوە و مرۆڤ لەنەبوون ،خوڵقاوە ، دروشمی زێرینی ،پێکەوەژیان، بۆتە بنێشتەخۆشکەی حاکمان و چاکخوازان و زانا وئاغاوکوێخا و دەمڕاستی ناوکۆمەڵگا. گەلێکیان خۆپێوە هەڵکێشاوە و خەڵکیان پێ فریو داوە و بگرە کراوەتە ئامرازی چەوسانەوەی گەلانی ژێر دەست.
سروشت ومرۆڤ و گیانلەبەران، سێ گۆشەو زاویەی پێکەوە ژیانن. ئەگەر یەکێک لەو قوژبن و گۆشانە، سست و لاواز بن هێلانەی بەرزی مرۆڤایەتی، هەڵدەوەشێ.
بەچکەی بنیادەم،بەڕەنگ و زمان و ئایین و کەلتووری جیاواز، لەدایک دەبن و گەشە دەکەن .خوای دلۆڤان، بەئازادی و تایبەتمەندی جۆراو جۆر، سازیان دەکا و ئەو کارەش بە نیشانە و هێمای خۆی ،دادەنێ.
بەڵام ،ئەوە مرۆڤە کە هەریەکەی بەنێوێک، دەست لە قوڕگی یەکتر دەنێن و هونەری پێکەوە ژیان نازانن و قەڵای ئینسانیەت ، بنکۆڵ دەکەن.
لەسەدەی سەروەری عیلم وزانیاری و دێموکراسی و مرۆڤ سالاریش، ئەو حەزو ئارەزۆیە نەهاتۆتە دی و بەری نەگرتوە.
ئێمەی کورد زمانیش، لە هەموو گەلان زیاتر وەبەر سێڵاوی ئەونەهامەتیە کەوتووین . هەرچەند لەرەگەز و ئایین و زمانێکین بەڵام هەریەکەمان بەنێو وناتۆرەیەک، سەرو کوێلاکی یەکتر هەڵدەپەردێوین وحەزو خۆشی یەکتر ، خاپوور دەکەین و فوو لە ئاگری دووبەرەکایەتی دەکەین.
یەکمان بەنێوی ئایین و یەکمان داراو نەدارو ساغ و نەخۆش، شاری و لادێیی،حیزب ولایەن و جوان و ناحەز، گەنج و پیر،پێشکەوتوو و دواکەوتوو، زاناو نەزان و سەدان نێو وهەڵبەستی دیکە، پشکۆی نەیاری و دوو بەرەکایەتی، دەگەشێنینەوە.
بەڵام لەو مابەینەی دا ، ئەرکی مامۆستا وەک پێغەمبەرێکی عیلم و زانیاری و پەروەردە، قورس تر و گران تر دەبێ.ئێمە بۆ بژارکردن ونێو کۆڵی ئەو دیاردە ناحەزو قێزەونە چمان کردوە؟ئایا توانیومانە لە دەورانی خزمەتی مامۆستایەتیمان لە خوێندنگە و کۆمەڵگا، ئەو نەخۆشیە بن بڕ بکەین؟ چ هەوڵێکمان داوە ئەو باسی یەکترنەکردنە و خۆبەیەکتر ماندوو نەکردنە، ویشک کەین تەنانەت هەرنەهێڵین سەرهەڵدا؟
با لەخەو ڕاپەرین و باوەڕ بکەین کەهەتا ئاخرزەمان، هیچ مرۆڤێک وەک یەک ناچن ئەگەر وەکێک چووبانایە، بوون و کەسایەتی تاکەکان ، مانای نەدەبوو.
رێز لە تایبەتی و بۆچوون وبیروخو و خدەی جیاوازی یەکتر بگرین ، خواپێدراون. بەهەر شێوەیەک بێ دیواری پۆڵایینی مابەینی مرۆڤەکان، برووخێنین.
ئەو کاتە، بەهاری دەستەواژەی پێکەوە ژیان ، دەپشکوێ و دەبینە هۆی شانازی خوای دەهەندە و دلۆڤان!
جەهانگیر بابایی ـ سەردەشت ـ زستانی ۹۷
