دل نوشته

نامەیەکی سەرئاواڵە

دۆستی دانیشتووی ڕۆژئاوام!
سڵاوێکی گەرم وگوڕت ئاراستە دەکەم کە ناسکتر لەهەستی بەیان،روونتر لە نازی کانی و بەتەوژم تر لە تیشکی خۆرە بێ.
زۆر لە مێژ نیە لێک دابڕاوین ، هەرچەند دوور لە باوەشی گەرم و باڵای بەرزو هەستی پاکت، بۆمن دڵ هەژێنە.
هەرکات وشەی کۆچ باڵ دەگرێ و بەرەوگوێم هێرش دێنێ قرچە لەهەناوم دێ و مووی ئەندامم قرژ دەبن، خۆ وشەی کۆچ لەگەڵ کورد، نامۆ نیە و دەستە خوشکێکی دێرینە.
ئەگەرچی ئەوین و دڵداری و دڵ پێکەوە گرێدان، نیازی بە لێک نێزیک بوونەوە نیە .وزەی خۆشەویستی، هێندە بەبڕشت و تەوژمە،کە هیچ کێو و دەریایەک و بەستەڵەکێک، ناتوانێ بەرگری لێ بکا.چوون ڕەگەز و هەوێنێکی تایبەتی هەیە .
هەرکەسێک کەوتە سەرهێڵی ئەوین ودڵداری،هیچ سنوورێک، ناتوانێ سۆمای گەشی کز بکات و پڵیتەی ژیانی داکێشێ و تیشکی رووناکی هەرگیزبە کزە بای دابڕان، ناکووژێتەوە.
ئەوین، شمشێرێکی تیژ و بڕندەیە تەنانەت زەمان و زوڵم و تووڕەیی وزیندانیش، هەنجن دەکا و هەتا ئێستا هیچ چەکێکی بەرگری ، بۆ نەدۆزراوەتەوە.
گەلێک دووانەی خۆشەویست هەن کە قەت یەکتریان نەدیوە یان لە باوەشی مێژوودا خەوتوون یان قەت لەم دونیایەدا بەچاو نابینرێن بەڵام ئەویندارەکە ی بە فرمێسکی پڕلەژان، دەبوورێتەوە و دەپشکوێ. بۆ وێنە هەستی خۆشەویستی خوای دلۆڤان لەوجۆرە عەشقانەیە!
ئێستا تۆی ئازیز، کە کەوتوویە وڵاتانی هەندەران، هەست دەکەم بەشێک لەدڵ و دەروونم لێ دابڕاوە و ەک ئەوەی کە بەچەپەچاخی هیجران و دووری، دڵم دوو بەش کرابێ .
بەڵام گەیشتن بەپلەکانی سەرکەوتن و بڕینی کۆسپی ژیان، هێزوباوەڕێکی پتەوی دەوێ.

هەوەڵ هەنگاوت کەدەنێیە وڵاتانی پیشەسازی و سەرکەوتوو، تارمایێک مێشک و بیرت دادەگرێ و هەستی خۆ بەکەم گرتن و بێ متمانەیی، پەلامارت دەدا و سەرت لەو هەموو تێکۆشانە و دەست ڕەنگینیەی مرۆڤی ڕۆژئاوایی، سووڕ دەمێنێ. بێ ئەوەی کە خۆت بتهەوێ سەری کوڕنۆش بۆ بیروفکری بەرز و پاکی ئەو وڵاته دادەنوێنی. بەلایەک دا ناحەقت ناگرم چوون لە گەڵ دواکەوتوویی وڵاتانی خۆمانی بەراورد دەکەی!

بەڵام ئازیزم!
ئەوسەرسووڕمانە، بێهۆشت نەکا وکێیەتی و کەسایەتی تۆ تووشی شێرپەنجە ی فەرهەنگی و داب و نەریتت نەکا. خۆدۆڕاندن و لەبیرچوونەوەی کەسایەتی،یانی مەرگی گەنج! یانی سڕینەوەی نەتەوە و مێژووی چەن هەزار ساڵە و پڕ لەشانازی!یانی توانەوە و ژێر پێ که وتن و هەڵنەستانەوە
! یانی ڕزینی مێشک و دەروون ودارووخانی کۆڵەکەی پیاوەتی و مرۆڤایەتی!
تووشی هەڵە نەبی ،ئێمە خاوەنی داب و نەریت و ڕەسەنی جوانین و گەلێک دەوڵە مەندین .

هەژاری و داماوی وڵاتانی ئێمە، تەنیا لەبەشی پیشەسازییە با پێک هەڵکێشانەکەت جوامێرانە بێ!
بڕینی لووتکەی سەرکەوتن و باڵادەستی، ئارەزۆ وخواستی هەرگەنجێکی ژیرو وریایە. ئەگەر ئەوهەستە نەبێ کەس بەرەو داهاتوێکی گەش، هەنگاو نانێ. بەڵام گەنجی ژیر دەبێ بزانێ کەسایەتی و بوونی خۆی، بەهیچ زێڕ و زەمبەرێک نافرۆشێ لەبەرئەوەی کە، لە قیمەت نایە بەهۆش بە ئەو گەنجینەو سامانەت لێ نەفڕێنن و هەڕاجی نەکەی!
من باشتر لەخۆت، ئەتناسم دەزانم ڕۆڵەیەکی وریا و ژیرو هەستیاری.دەزانم چەندە دڵسۆزی گەل و نیشتمانی، بۆم روونە بۆ هەتیوی و بێکەسی و هەژاری گەلەکەت، مێشکت پڕ لە ئازارە. وەبیرم دێ کە چەن ها شەو، فرمێسکی گەشت بۆ ژانی گەل، لاجانگی خووساندووی و دەردو مەینەتت کێشاوە.
بەڵام سەرەڕای ئەو هەموو خاڵە باشانەی کەهەتن بەپێویستی دەزانم وەک هەواڵێکی خۆشەویست و بەئەمەگ، زەنگی وەبیرهێنانەوەت وەدنگ بێنم نەوەکوو خوای نەکردە سەرسام بیت و جوانی و زریقەو بریقەی شارستانیەت، لە هەوڵ و تێکۆشان و خۆێندن، دوورت بخاتەوە وبەشتی پڕو پووچ، بتخافڵێنێ.
جێگاکەت ،وڵاتێکی بێ دەنگ و هەراو دوور لە شەڕ و کوشت و کوشتارە.مێشک لەدۆخی ئاوا ئارامدا دەپشکوێ و بەرهەمی جوان پێک دێنێ.ئەوان توانیویانە بە قیمەتی گیانی ئێمە ،ئەو هەل و فرسەته بۆ هاووڵاتیانی خۆیان دابین بکەن.
کاتێکی زۆر و بەنرخت هەیە،لاپەڕەزێڕینەکانی مێژوو وەرد بدەوە.بزانە کەئەو وڵاتەی کەتۆی سەرسام کردوە چ تاڵان وبڕۆیەکی بۆگەیشتن بەو دەوڵەمەندیه هەبوە! چەن ها وڵاتی هەژارو نەداری وەک ئێمەی قڕ کردوون هەتا بۆ خۆی هاتۆتە سەر!.
بۆ سەرهەڵدانی خۆیان، ملێونەها هەژارو بێکەس و ڕەش و رووتیان،لە خوێن دا گەوزاندوون. چەن ها دایک و مناڵیان لێک دابڕیون و سەدان سێدارەیان بۆ لاوان وگەنجانی ئەووڵاته هەژارانە، هەڵاوەسیون .گەنجانێک کە تەنیا بۆ ڕزگاری و سەربەخۆیی نیشتمانەکەیان وە جواب هاتبوون وچەکی شەڕەفیان کردبۆ شان. هەر ئەوان لێمان بوونە ئاغا و کوێخا ،بەنێوو مۆرکی دزو جەردە و ئاژاوەچی ، پەتکیان لەمل کردن.
بە زانیاری و بەڵگەی باوەڕ پێکراو سەلمێنراوە کەکۆشک و بناغەی ڕۆژاوای ئەوڕۆ، لەسەر کانی زێڕو نەوت و بەرهەمەکانی وڵاتانی ئەفریقا و ئاسیا دامەزراوه .بەناو ئاوەدان کردنە

وە( ئیستعمار) سوپایان خستۆتەناو ئەو وڵاتاته دەوڵەمەندانە و بەڵام لەڕاستی دا دزی و تاڵانیان کردوون.
هێزی لەبڕان نەهاتووی گەلەکەت،هێندە قووڵ و بێ بنە و ڕابردوێکی پڕلەشانازی لە پشته کەهەموو زانایەکی مێژوو ناسی خۆیی و بێگانە، دانی پێ دێنێ.
ڕەچەڵەک و ڕەسەنی ئێمەی کوردی ئەوڕۆیی بەپێی بەڵگەی زانایانی ئورووپایی، دەگەڕێتەوە سەرلۆلۆکان وگوتیەکان و مادەکان، کەئەوانیش بناغە و کۆڵەکەی کۆنن،تیشکی جوامێری و پیاوەتیان وێردی سەرزمانە.چەن ها پسپۆرو ئەدیب و شاعیرو عارفمان هەن کەلەبەر بێکەسی و بێ وڵاتی، نێویان ونەو لەژێر گڵکۆی مێژوودا خەوتوون.
کورد ،دوو کۆڵەکەو پشتیوانی وەک نەتەوە و ئایین لە ژیاندا هەن کە بەمتمانەوە هێزێکی پۆڵایینن و لەبەرامبەر هەموو هێرشێک، دەیانپارێزێ.
جاتوخوامن بەرەباب و پشتی ئەو گەلە ڕەسەنانە بم و مێژوێک ئاواپڕشنگداریان بۆ خۆڵقاندبم ڵەهەڕەشەو گوڕەشە وفڕو فیشاڵی فەرهەنگ و دابی ڕۆژاوا دەترسم؟ خۆدۆڕاندن لەو جێگەیە دا، هێمای ترسەنۆکی و بێ غیرەتییە!
لەلایەکی دیکەشەوە خوایەکی وشیارو بەهەست و دلۆڤان، کەلەهەموو کات و ساتێک دا، بینای حاڵمانە ، دایمە بێ نووستن و خەونووچکە، چاوەدێری کارو کردەوەو هزرو بیرمانە.کەسایەتێکی ئاوا بەڕیز،شک بەرم چۆن خۆم وژیانم دەدۆڕێنم؟
بەلێکدانەوەیەکی سادە، دەردەکەوێ کە ئاڵای شۆرشی موحەممەد( د) بۆ ئازادی و ڕەهایی چینی چەوساوە و کۆیلە بوە و درووشمی بەرابەری ڕەگەزی ڕەش و سپی داگیرساندوە وپشتی ساماندارو زاڵم و زۆرداری چەماندۆتەوە.
باوو باپیرانی جوامێرو زانای ئێمە،هەر زوو ،لە پێش زۆربەی گەلاندا ڕاپەریون و زانیویانە کە ئایینی ئیسلام چەندە دەوڵەمەندو بەپێزە. بۆیە نوێنەری تایبەتی ولێزانیان ناردۆته خزمەت موحەممەد(د)و بەباوەشی گەرم و ئاواڵە بەپیریەوە چوون.
مرۆڤی ژیرو تێگەیشتوو ، چاکە و خەراپە جوان لێک هەڵداوێرێ و یاسای ڕێک و پێک و دەوڵەمەند و بەپێز، بۆ خۆی و دۆستانی هەڵدەبژێرێ. هەتا بتوانی شارستانیەت و نەجابەت ومانەوەی خۆی، سەقام گیر کا.
هەرئەولێک دابڕانە و دواکەوتووییە و بێ کەسیەی کە ئێستا یەخەو بەرۆکی من و تۆ و گەلەکەمان،بەرنادا بەرهەم و خەڵاتی ڕۆژاوایە کەزۆر بەناپیاوانە و خوێڕی گەرانە، ئەتکیان بە گەلی ئێمە کردو لاق و لەتەریان بڕینەوە.
بەداخێکی زۆرگرانەوە، زۆرێک لە گەنج و لاوی کورد، لەو تاوانە مێژووییە بێ ئاگان و نازانن بەزم و هەراو کیمیاباران و ئەنفال و کۆچی ئێستای لاوانی نیشتمان، هەرتاوان و هەڵەی وڵاتانی پێشکەوتوویە!
خۆشەویستم!
تۆ چاو لەو حکوومەتانە ی ڕۆژهەڵات مەکە کەبەناو دین گەلانێکی هەژارو بێکەسی وەک ئێمە دەچەوسێننەوە ،ئەوانە بۆ مانەوەی خۆیان و ڕەزامەنی ئاغاکانیان، مۆرکی دین و ئایین لەو بیرقرپۆکەیەیان دەدەن ئەگەر ئاوانەکەن چیدی ناتوانن دەسەڵات ڕاگرن .
لەبیرت بێ، هیچ مرۆڤێک جێگروو نوێنەری تایبەتی خوا نیە. ئەویش وەک من و تۆ، ئینسانە جابا لە هەر ڕەسەن و ڕەچەڵەکێک بێ.خوای لێزان کەسی لەکەس بانتروباڵا دەست تر ساز نەکردوە ئەوە کردەوەی جوان و پەسەندە کەڕێزو حورمەتی مرۆڤەکان هەڵدەسەنگێنێ.
هیوادارم ،باڵاخانە تیژو بەرزەکان و شەقامە پان و بەرینەکان و کارخانەی پیشەسازیەکانی ئەورووپاو ڕۆژاوا،سڕت نەکا و خۆت لەبیر نەباتەوە کە کێی و لەکوێڕا چووی و بۆ چی چووی؟
بەشی پیشە سازی و ئامێری درووستکراو لەگەڵ دەوڵەمندی فەرهنگ و مێژوو و مەعنەویات و پیاوەتی، لێک جیا بکەوە و هەرشتەی لەجێگای خۆی دانێ.
هەردەم لەبیری ڕۆڵەکانی سنوور نشین و هەژارو بەرگ شڕ ودەست قەڵشاوی ئێرە دابە هەتا بتوانی لە داهاتوێکی نێزیک دا،ئاستی زانیاری و هزرت گەشە پێ بدەی و لەخزمەت گەل و نیشتمانتدا وەگەڕی بخەی و بەتێگرا هەژاو چەوساوەکانمان لەو نەگبەتییە ڕزگار بکەین.
ئەوجار بۆت ئاشکرا دەبێ کە مەبەستی من چ بوە و بۆ ئاوا دڵم پڕە لەدەرد وژان و پێنووسم گڕەزۆک و چاو بەگریانە!
چاوەکەم!
بەخوای مەزن و دلۆڤانت دەسپێرم،قەت لەبیرم ناچی! وێنەی جوانت لەناو دڵم دا هەڵداوەسم!بۆنی ئەوینت لە شنەی شەماڵ وگفەی زریان وەردەگرم و وەڕەزی تۆی پێ دەشکێنم !
چاوەڕوانی پێوقەدەمی پڕ خێرتم هەربژی فێنکایی دڵم!
هەواڵێکی خۆشەویستت لەڕۆژاوا

جەهانگیر بابایی ـ سەردەشت ـ بەفرانباری ۹٨

از طريق
جهانگیر بابایی
منبع
http://sozimihrab.org/
برچسب ها

نوشته های مشابه

پاسخی بگذارید

نشانی ایمیل شما منتشر نخواهد شد.

لطفا نظرات خود را با حروف کوردی یا فارسی تایپ کنید
نظرات حاوی مطلب توهین آمیز یا بی احترامی به اشخاص ، عقاید دیگران، و مغایر با قوانین کشور منتشر نمی شود
نظرات پس از تائید منتشر می شود
بستن