دل نوشتهمناسبت ها

ڕەمەزان هێمای هێور بوونەوە

دوای ئەوەی خوای زانا و کار بەجێ مرۆی ئافراند و کردیە جێنشینی خۆی تا ئەرکی ئاوەدان‌کردنەوە و ڕازاندنەوەی دەر و دەروون وەئەستۆ بگرێ، ئەوی بە کۆمەڵێک تایبەت‌مەندی تەیار و پڕچەک کرد بۆ ئەوەی بتوانێ ڕووبەڕوی نەیار و نەهامەتیەکان ببێتەوە و لە مەیدانی خەبات و ململانێ لە گەڵ ناحەزانی ناوەکی و دەرەکی زاڵ و سەرکەوتوو بێت.

یەکێ لەو تایبەت‌مەندیانە هێزی ویست و ئیرادەیە، واتە دوای ئەوەی مرۆڤ ئەو هێزەی پێ‌بەخشرا بتوانێ زانیاری جۆراوجۆر کۆبکاتەوە ئەمجار نۆبەی ئەوە دێت بتوانێ لە ناو ئەو هەموو زانیاری و ڕێگە و ڕێچکانەدا بە ویستی خۆی یەکیان هەڵبژێرێ.
گومان لەوەدا نیە کە ڕێچکە و ڕێباز و ویستەکان فرە و فراوانن، بۆیە گەر مرۆڤ لە ژێر چەتری ڕێنماییەکانی خوای زانا و باڵادەستا نەڕوا و نەژی دەکەوێتە بەر ڕەهێڵە و هەورەتریشقەی ویستە ناحەز و نامۆکان و ئاوەزی لە هەمبەر نەوسی بێ ئەماندا بێ هێز و دەستەوسان ئەمێنێتەوە و لە ئاکامدا ژیانی دونیا و دواڕۆژی ئەدۆڕێنێ.
بە واتایێکی‌تر: گەر لە زەریای زانستی خوایی جۆ هەڵنەگرێ و گڕ و تینی ناخ و دەروونی بەو زانستە تێراو و هێور نەکاتەوە سەرچڵ و نەزانانە ئەجووڵێ و هەنگاو هەڵدەگرێ و ڕەوڕەوەی ژیان بەرەو ئاقارێک دەبا کە سەر لە خۆیشی و زیندەوەرانی‌ دیکەیش دەشێوێنێ.

ڕۆژوی ڕەمەزان یەکێک لەو ئامرازە گرینگانەیە بۆ هێدی کردنەوەی مرۆڤ و دیاری کردنی چوارچێوە و ئاسۆیێکی ڕوون بۆ خواست و ویستەکانی و بە دەستەوە گرتنی جڵەوی نەفس و هەوا، چونکە کاتێک مرۆی ڕۆژوەوانی ڕاستەقینە خۆی بار دێنێ و خوو دەگرێ کە نەفسی سەرکەشی گڕوو نەگرێ بۆ خۆشیەکان و بە ئارەزووی خۆی بۆ ماوەیێکی دیاری کراو دەستیان لێ هەڵگرێ و لە خۆی یاساغ بکات، بێ گومان فێر دەبێ لە ڕۆژانی دوای ئەو وەرزە پەروەرشیەیش مەرز و سنوورەکان نەبەزێنێ و سەرکەشی ئەسپی چەمووشی نەفس دابەزێنێ و لە بەردەم ویستە ئایینیە مرۆڤ پەروەرێنەکاندا بی‌گەوزێنێ؛ کەوایە دەتوانین بڵێین ڕەمەزان ئاشت‌بوونەوەی مرۆیە لەگەڵ:

ـــ خوا، خوای خاوەنی مرۆڤ نایهەوێ بەندەکانی گرفتاری ئاور و تووڕەیی بکات، ئەوە مرۆ خۆیەتی ئەو کانگەی سۆز و خۆشەویستیە لە خۆی ئەتۆرێنێ و بە ڕوووەرگێڕان لەو خۆری ژیانە ناوماڵەکەی تاریک و ئەنگوستەچاو دەکا.
ـــ خۆی، مرۆڤی سەرکەش خۆی بە خو و خدە ناحەزەکان ناشیرین دەکا و جوانیە سروشتیەکان ئەتارێنێ، ڕۆژوو فێرمان دەکا ناحەزەکان ڕاماڵێن و ناخمان پاک و پاڵفتە بکەین و لە گەڵ خۆمان ئاشت بینەوە، چونکە مرۆڤ بە خۆ ناشیرین کردنی بە ڕەوشتە ناڕەواکان ستەمی لە خۆی کردوە و سەری بەرز و ئاکاری تەرزی نەوی و نامۆ کردوە.
ـــ خەڵک، مرۆی تەرە و لاڕێ خەڵکی خۆش ناوێ و هەستی سۆز و بەزەیی بۆیان ناجووڵێ، برسیەتی و توونیەتی فێرمان ئەکا هەست بە نیاز و نەداری هەژاران بکەین، خۆشمان بوێن و تا کۆتایی هێنان بە گرفتەکانیان ئۆقرە نەگرین.

ئەوەیە کە دەبینین قوڕئانی پیرۆز ئەفەرموێ فێرگەی ڕەمەزان و ڕۆژوو فێری تەقوا و پارێزگاریتان ئەکات، واتە خۆپاراستن لەو هەڵسوکەوتانەی کە مرۆڤ ئەخاتە بەرەی شەڕ و ناتەبایی لە گەڵ خوا و خۆی و خەڵک و ڕێ‌خۆش دەکا بەهرەمەند بین لە ژینی بێ‌ژان و لێوڕێژ لە ئاسوودەیی و ئارامی؛ بە واتایێکی‌تر: قوڕئان داوامان لێدەکا هەوڵدەین بۆ دروست‌کردنی ئاشتەوایی و پردی پەیوەندی لە نێوان ئەو سێ کوچکەی ئاماژەمان پێدا، چونکە گومان لەوەدا نیە کاتێک مرۆڤ نێوانی لە گەڵ خوا خۆش و ئاوەدان بوو ناخ و دەروونیشی ئارام دەگرێ و لە هەڵچوون و هەڵەشەیی دەست‌هەڵدەگرێ، کە ئاکام و بەرهەمی ئەو پەیوەندییەیش دەبێتە بەهرەمەند بوونی تێکڕای کۆمەڵگە لە خێر و بێری هێمنی و لە سەرەخۆیی.
بەڵام مەخابن ئەو ئامانجە گەورانەی ڕۆژوی بۆ دانرا لە ناو زۆربەماندا نەهاتوەتەدی و ڕایەڵ و پۆی ڕەمەزانی مەمانان ئەو تەونە تەواو و پتەوەی پێدانامەزرێ کە جلی گەرم و بە کەڵک‌هاتوو بەرهەم بێنێ و لە سەرما و گەرمای گەرمێن و کوێستانی ڕۆژگار بمانپارێزێ.

خوایە گیان! ڕێنوێن و یاریدەدەرمان بیت بتوانین لەو وەرزە ڕازاوە و ڕەنگاڵە بۆن و بەرامی گوڵانی بۆن خۆش و هەست بزوێن هەڵمژین و لە کەش‌وهەوای تەم و مژاوی و خنکێنەری دونیا پەرەستان ڕزگار بین.

          احمد عباسی - بانە ـ ۱۴ / ۲ / ۱۳۹٨

از طريق
احمد عباسی
منبع
sozimihrab
برچسب ها

احمد عباسی

استان کردستان - بانه نویستده - مترجم - فعال دینی و اجتماعی

نوشته های مشابه

پاسخی بگذارید

نشانی ایمیل شما منتشر نخواهد شد.

لطفا نظرات خود را با حروف کوردی یا فارسی تایپ کنید
نظرات حاوی مطلب توهین آمیز یا بی احترامی به اشخاص ، عقاید دیگران، و مغایر با قوانین کشور منتشر نمی شود
نظرات پس از تائید منتشر می شود
بستن