داستانکوردی

کورتە چیرۆک !

چیرۆک

پیرە سروشت،لەوەرزی هاویندا گەلێک کڵۆڵ بوو،پشتێکی چەماو و ئەژنۆی شل و لەڕو لاواز و لە ژیان ماندوو.
کۆخە کۆخ و هەناسە بڕکە،ئەمانی لێ بڕیبوو،باڵای بەرزو قۆچاغەکەی، دوولاهاتۆتەوە،بە یارمەتی لاقێکی بێ رووح بەناوی گۆچان ڕێگا دەپێوێ.

ئای ڕۆژگار،بۆ ئاوات لێ کردم، چ بووم و چم لێ بەسەرهات،یادی بەخێرلە قۆناخی گەنجیم ،شام بەسەپانی خۆم نەدەزانی،ماندوویی چی ودانیشتنی چی؟دەتگوت ئەسپی عەرەبانم چاپۆکم داویشتن!

مامە سرووشت گەیشتە مەڵبەندی پاییزو بارگەو هەواری لێداکوتا، بەڵام پاییزی چی!ئەوەی رووحم و بەزەیی بێ نەیبوو، وەک چەتە و ڕێگر کەوتە گیانی مامە پیرە و وەک دەواری شڕی لێکرد.تیتۆڵی پێوە نەهێشت، سەرو گوێلاکی داڕنین و گەڵا و سەوزایی لێ هەڵوەراندن. زۆر جوان نەریتی میوانداری بەجێ گەیاند، هەی ئافەریم خانەخوێ باش!

پیرەسرووشتی بێ کەس و بێ دەر و غەریب، هێندەی دی دڵی شکا،بێ دەرەتان و پەشۆکاو و لاواز، لەسەر فەڕشی مافووری زەوی لێی درێژ بوو، عەرزی کردە پێخەف و عاسمانی وەک لێفە بەسەرخۆیدا هەڵکێشا.

وردەوردە کزەبای سەرماوەز،دەگڤێنێ،خۆریش ڕوو خۆش نەماوە مۆڕەمۆڕە دەکا،زەوی و زاریش خووساوە و میوانگرنەماوە، دارەکانیش رووت هەڵگەڕاون و چیان پێنەماوە لەخۆی پێچن جانەخوازە سێبەرو سابات بۆ ڕێبواران، سازکەن.

تەنیا کزە چرای هیوا بە ژیان، لە دڵی مامە پیرەی سرووشت دەترووسکایەوە .بەشەلە شەل و خۆبادان ولەسەر ئەژنۆ رۆیشتن، تۆوەکانی سرووشتی دەچاند و دەیدانە دم کزەبایەکە، هەتا بۆی داچێنێ ولەناوقەڵشت و دڵی گڵدا، بڵاویان کاتەوە .

مامە سرووشتی لێقەوماو بێخانە و لانە،تۆوی ژیانی داچاند و ئەوجار خەمی هیچی نەما دەیزانی تازە نامرێ و هیچ بەربەستێک پێش بە ژیانی نوێی ناگرێ.
خۆی دایە دەستی ژیان و گوتی یان سەرخەرمان، یان جێی نەرمان.

ئەوجار بەرەو وڵاتی زستان کەوتە ڕێ و پاییزی بەجێ هێشت. سەدشکوور بەمیوانداری پاییز، چ ئاژاوە و هەراهەرایە،بەستەڵەک و مەرگ لەئارادایە.
زستان چ دڵڕەقانە،هەموو شتێک دادەپەڵۆسێ،وزەی لەمامە پیرە بڕی بە شمشێری شاخەسەهۆڵ دڵی کون کون کرد و لەشی ساردو سڕ هەڵگەڕاند.کەس زاتی نیە متتەق بکا، فەرمانە فەرمان.

ژێرخاکی کردۆتە مەکۆی ئەوینداران و لانکەی شۆڕش.چەقەرە و تۆو بنچک و چووزەرەی داروو گوڵ، دەڵێی هەنگن پوورە دەدەن .شۆرش و بەرخۆدان لە ئارادایە .
کات کاتی حەماسەیە،دڵی زەوی وەجۆش هاتوە و بەفر بنکۆڵ کراوە.ئاڵای حەماسەو شۆڕش،دژی داگیرکەر دەشنێتەوە.چاوەڕوانی فیتوویەکی مانگی ڕەشەمەیە.

ڕەشەمە،بۆ پیرە سرووشت جەژن و شادییە،دەزانێ نەوە و نەتیجەکانی لەوپەڕی گەنجی و لاوەتیدان، دەزانێ دڵگەرم و پڕلەهەستن،دەزانێ تۆڵەی پاپیرەی کڵۆڵ و سڕ و کۆڵەواریان دەکەنەوە،دەزانێ سەربۆ زۆردارو چەوسێنەر، نەوی ناکەن!دەزانێ بەسەر مەرگدا سەردەکەوێ، دەزانێ بۆ مەرگ سازنەکراوە!

ئێستا کاتی بووژانەوەی مامەپیرەکەمانە، پۆلەهەوری دەنگ داون تەپڵ و دەهۆڵی شەربکوتن و بەڕێژنەباران جەرگی بەفرو سەهۆڵی دڵ رەق بکۆڵن و چەقەرە و رەگ و ریشەش لەبن خاکڕا، چنگ و نینۆکی سەهۆڵ بقرتێنن و بچنە پێشوازی بەهارێکی کە پیرەسرووشت بەڵێنی دابوو.

دەی با ئێمەش تێهەڵکێشێک لەمابەینی سرووشت و رووحی خۆمان بکەین!
ئەگەرچی رووحەنازدارەکەی مرۆڤیش بەهۆی تاوان و ماڵ دۆستی و دونیاداری و مرۆڤ خۆری و پۆست و مەقام و فریوخواردن،سڕدەبێ و دادەمرکێ و لە گوڕ وتین دەکەوێ ولەخوا و چاکە و خێرخوازی و مرۆڤ دۆستی و پیاوەتی دووردەکەوێتەوە و شلکی و ناسکی و نازاداری نامێنێ ویاغی دەبێ.

بەڵام هەرئەورووحە دەتوانێ سرووشت ئاسا خۆنۆژەن کاتەوە و جارێکی دیکە چووزەرەی باوەڕو چاکە و جوامێری سەرهەڵداتەوە .هاتنی پێغەمبەران لەچاخە جیاجیاکانی مێژوو هەربۆ ئەومەبەستە پیرۆزە بوە.

دابەزینی قورئان لەناو چاخی ڕەمەزاندا،گەلێک مەبەست و ئاڵ و گۆڕی لەپشته، کە هێما و مرۆڤ دۆستی خودای تێدایە،کەچەندە بەندە دۆستە! کارگایەک بەنێوی ڕەمەزان داناوە کە ئەرکی لابردنی تەپ و تۆزی غەفڵەت و نەزانی و داتەپینە.

شۆڕشەکەی حیرا،لەناو کاکڵەی ڕەمەزاندا چەخماخەکەی لێدرا، لەشاخەوە بەرەو شار خزی و لەماڵەکەی ئەرقەم ڕا ڕاپەری و تیشکی هاویشته مەدینە و لمزارەکەی دوورگەی عەرەبی و جیهان.

لەڕەمەزاندابوو کە ئاهەنگی شنەبای (یا ایها المدثر، قم فاانذر،وربک فکبر وثیابک فطهر)بوومەلەرزەی خستەشاری مەککە.رەمەزان مەشغەڵی رابوونی رووحه،توێخ هاویشتنی مرۆڤە،داماڵینی بەڕگی ڕزیوی رووحە!

پەیامی(ٲقرٲ)هەوەڵ مەشغەڵی عاسمان بوو کە هاویشرایە ناو سرووشتی رووحی پێغەمبەری نازدار،ئەوی هەڵایساند و بڵێسەی ئاگری خستە ناو رووحە چەمیوەکان.

هەتا حەماسە لەناو حیڕای مێشکی هەرمرۆڤێک لێنەدرێ جەستەکان هەروا سڕ و لاوازو کەنەفتن!

جەهانگیربابایی ـ سەردەشت ـ گوڵانی ۹۹

از طريق
جهانگیر بابایی
منبع
http://sozimihrab.org/
برچسب ها
نمایش بیشتر

نوشته های مشابه

دیدگاهتان را بنویسید

نشانی ایمیل شما منتشر نخواهد شد.

دکمه بازگشت به بالا
بستن
بستن