وڵات بەهەشتی سەرگۆی زەوینی
شنەی گڕگرتووی خۆشی و ئەوینی
خەمڵاوە باڵات بەگوڵ و گوڵزار
قەت لێت نابڕێ تامەزرۆی بەهار
پەرژین کراوی بەتەپۆلکە و کێو
بەشیوو دۆڵ و هەوراز و نشێو
دەستی ناحەزان لەبەژنت دوورە
بۆیە داوێنت بەخوێناو سوورە
دایم سەرسەوزی بەچۆڕکەی هەوران
لەشت دادەشۆن بەرووباری جوان
بەفری سپی و سۆڵ نیشتە کێوانت
مەڵحەمی زامە بۆ دەردوژانت
فێنک ڕادەگرن گەرمایی ژیان
بۆوچان دانی هەڵمەت و قوربان
رووبار وەک پشتێن لەدەورت هاڵان
وەک رەشبەڵەکی لاوو چاوکاڵان
داربەڕوو و مازوو،کەزیەو بسکی تۆن
ئەویندارێکی ئاشق و سەربەخۆن
زریان و بەفرو شەختەو سەرماو سۆڵ
کێو و بەندەنیان پێ ناکردرێن چۆڵ
کێوت مستێکن، بۆدمی داگیرکەر
سەریان هەڵداوە بۆهەوران یەکسەر
باڵاپۆشێکی سەوزت کردە بەر
رێبوار و خەڵکت راکێشایەدەر
داوێنی بەگوڵ و شیلان ڕازاوە
خاڵی سپی و سووری لەشان هاڵاوە
مێوت شل و مل،دەکەن لەنجەولار
خۆدەلەنگێنن بۆ سەمای بەهار
پرچیان پەرێشان لەسەرشان و مل
چاومەست و نازوشیرن و چاوبەکل
لەشارو دەشت و کوێستان و لادێ
دەنگی دیلان و بەزم وهەرا دێ
دەتریقێنەوە هەور بەقاقا
دوژمن رەپێنن بەزرمەوهەرا
رێژنەی بارانت سمکۆڵی سوارە
پڕمەو حیلانی جوانووی بەهارە
لەغاو پسێنە و دێتە سەرپاشوان
دەبڕێ هەناسەوجەرگ وهەناوان
بڵێسەی زەماوەند لەکوێستان دایە
نەخۆشی و ماتەم سەری هەڵنایە
بەشەقەی باڵی خاسەکەوی کۆ
غەمزەو نازداری دەکا هاتوو چۆ
خەمرەوێنێکن بۆدڵی نەخۆش
دەفڕێنێ دەردە وپەژارە و پەرۆش
وەی لەمۆسیقای خوڕەی کانیاوان
مەست دەکەن بڵێسەیی ئاگری لاوان
لێوو لەتەری پەنجەی کەژو کێو
شین هەڵدەگێڕن هەورازو نشێو
شلک و ناسکە دم و لێوی گڵ
ئەوین بزوێنە،وێنەی سوورە گوڵ
بەهەڵپەڕین و هەڵبەزەو سەما
قەڵەمبازدەکەن بۆداوێنی چیا
کیژی نازداری هەنارو هەرمێ
مێوو بادام و گوڵی زەردە بێ
بەگەڕی شایی لەناو چیاوچۆڵ
خۆدەلەنگێنن ناسک وخرت و خۆڵ
پرچیان داوەتە دەست شنەبایە
سەمای دڵداران وا لێرەدایە
گوێیان بەگوارەی ڕەش و زەردو سوور
شەبەق و تیشکی وەک خەرمانەی نوور
چواروەرزت تابڵۆی بەهەشتی خودان
بۆیە جوانیەکان شێت و هەڵوەدان
سفرەی پڕخوانت سەرلێوە لەژیان
خەڵاتە بۆمنی کوردی بەستەزمان
ئەگەرپێنووسی هەموو پەلی دار
بەئەقیانووس و چەمی هاج و هار
بێنم بنووسم وەسفی جوانی تۆ
ئەژنۆیان دەشکێ ودەبن ڕەنجەڕۆ
بمێنە هەردەم بووکی کوردستان
بۆ حەسانەوەی مرۆڤی جیهان
????????????????????????????????????????????
جەهانگیربابایی ـ سەردەشت ـ خەزەڵوەری ۹۹
