تاریخ

پەیام‌و زاڕۆی(شعر اورامی)

ئەدالی ، تاته ، مۆژده وەنەتا/
خوداوەن منش ، بەخشـــا پەنەتا/

وەشی ژیان و ، بەرو دلیەنا /
پاکەو بۆ وەشە ، پێسەو گۆڵیەنا/

بزاندی تـەحقیــق ، به زیرەکانه/
ئەمانەتەنا ، ناێنا دەستانا ! /

دماو ئینەی خودا ، نەخشەش کێشانا/
پاک و هەم بێ عەیب، دەس شمەش دانا/

ئاها چن جوان و ، بێ تاوانەنا !/
قسی مەزانوو ، بەسه زۆانەنا!/

جه لاو شمەوه ، فێر بوو رەفتارم/
شێوەو ژیوایم و ، وشەو گۆفتارم /

دەی هۆش وێتا بۆ ، کارێ نەکەردێ!/
سەبای قیامەت ، حەسرەتێ وەردی/

تەمیس رێعایەت ، کەردی ئەمانەت/
پەێ ئـەمـانـەتـیی ، نەوتا خیانەت/

فەرقێوەش نیەن، ئەی ئەمانەت دار/
کۆڕ یا کناچی ، لاو پەروەردگار/

شەرت رێعایەت و ، بار ئاوەردەیشەن/
به دەستور و خودای،بەخیو کەردەیشەن/

با یەقینتا بۆ ، خودای ساحێو مەکان/
به پاکی منش ، سپەردەن دەستان/

شمەندێ هەرجۆر ، که بارم باردێ !/
دەس فریشته یا ، مارم بسپاردێ /

ئینه حەق شمەن ، کەردێم پەروەرش/
نیشانەم دەیدێ ، ئاداب و رەوش/

پەیامم پەنەن ، بابەی دڵ سۆزم/
پەی تۆ! پەی ئەدایم!پەی گەل و هۆزم/

وەڵی گر کەسیی ، پەری تۆ بابه/
وەسیەتم ئانەن ، ئەهلو تەقوا به/

لازمه و ژیوایم ، جه ئی دنیانه /
غەیر جه حه‌ڵاڵی ، ناوەری یانه/

ساحێب ئەخلاق و ، رەوشتی جوان به/
چەنـــــــی گر کەســـــی ، شیرین زۆبان به/
ئیی جاره پەی تۆ ! ئەدای عەزیزم/
هەر چن زاڕۆناو ، نیەن تەمیزم/

وەڵێ گر چێوێ ، رێعایەت تەقوان/
پەیڕەوی کەردەی، بەرنامەو خودان/

ئەدا گیان چونکه ، سینەت هانەمەن!
گەورێم کەرینه ، باۆشێت یانەمەن /

چوون جه سینەو تۆ ، من وەرو خۆراک/
وێت نەوەرینه ، غەیر خۆراکی پاک/

ئه دا بڐیه پەێم ، من بێ زۆانەنا!/
نه خاس و نه خرا ، هیچ نەزانەنا !/

لاو تۆۆه فێر بوو ، کەلام و گۆفتار/
تۆ نیشانەم دەی ،چەنی بیەی رەفتار/

هەتا شش ساڵێ ، مامۆسامەنی /
تۆ پارێزەر و ، هەم جه لامەنی ! /

تۆ درەختەنی ، من سەمەر تەنا !/
راس یا لاره بی ، من سێبەر تەنا !/
دەی تۆ خوا ئەدا ، چەنیم راسه به /
مۆعه للمێوه ، حەق شناسه به/

هەم تۆ هەم تاتەم ، رەوشتا خاس بۆ/
تا لەقه کەیچتا ، سێبەرش راس بۆ /
ئەمما وەسیەتم ، پەری هۆزه کەیم/
پەی کەس و کاره ، فره دڵ‌سۆزه کەیم/

واتەو رەسولەن ، مۆژدیوه وەشه ن /
بەد بەخت ئا کەسنه، چەنەش بێ بەشەن/

لازما واچیۆ ، با گر یۆ زا نۆ !!/
مەرده حەقش چی ، دنیای مەمانۆ!/

یەرێ چێوێ هەن ، هەر کامش بۆنه/
شۆنەو وێشەره ، کەڵکش مەنۆنه !/

سەدەقەی جاری و ، عێلمێ نەفعەش بۆ/
خەیره بارۆنه و ، پەی شەڕ دەفعەش بۆ/

یەرەمین زاڕوێ ، که تەقواش بۆنه/
تاوا دماو مەردەی ، نەفعەشا بۆنه !/

دەی تۆ خوا جۆرێ ، بارم باردێنه/
ئاچی یەرەنه ، زەرەر ناردێنه/

ئەگەر به قۆرئان ، کەردێم په روەرش/
نیشانم دەیدی ، ئاداب و رەوش /

یه قین پەی دینی ، داراو کەڵکــی بوو/
دڵسۆز «غەریب»با و ، یارو خەڵکی بوو/
ئیسماعیل رزائی (غەریب)

نمایش بیشتر

اسماعیل رضایی

استان کرمانشاه - شهرستان کرمانشاه شاعر و فعال دینی

نوشته های مشابه

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

دکمه بازگشت به بالا