تاریخ

زوێر (شعر کوردی)

ده‌ڕۆم، ده‌ڕۆم 

له‌به‌ر بڵێسه‌ی ئاوری ئه‌م وڵاته

خه‌ونه‌کانم

ئه‌بنه سه‌هۆڵ!

 

په‌ڵه هه‌ور و ڕه‌وه‌زه به‌رد، هه‌موی گه‌ڕام

که‌سم نه‌بینی

داخی دڵمی بۆ هه‌ڵڕێژم!

ناچار یونس ئاسا، دام له دڵی ده‌ریا و

حه‌زه‌کانم

هه‌موی سوتان

به ده‌س شه‌پۆل!

                                               * * *

ده‌ڕۆم، ده‌ڕۆم

پشتم قه‌رزاری قامچی

هیچ که‌س نیه

به شه‌و ده‌ڕۆم،  به ڕۆژ ده‌ڕۆم

هه‌تا چاوی ته‌مه‌ن بڕکا

پێم به‌س نیه!

                                           * * *

ده‌ڕۆم،  ده‌ڕۆم

قاپ و که‌چکی هیچ پاشایێ

 نالێسمه‌وه!

په‌یمان ئه‌ده‌م

وشه بۆ هیچ به‌ژن و باڵایێ

ناڕێسمه‌وه!

                                               *   *   * 

ده‌ڕۆم، ده‌ڕۆم

له وڵاتێک، به‌رماوی ڕێوی

بۆ شێر بێ!

سه‌گ له گه‌ڵ گورگ

به مه‌ڕ فێر بێ!

که‌وده‌ری له پێش پێشاوی ئاوایی و

مراوی له هه‌ڵدێر و زه‌نوێر بێ!

چۆن گیر ئه‌بم؟

ئه‌گه‌ر بست به بستی

هه‌موی زێڕ بێ!

٭     ٭    ٭

ده‌ڕۆم، ده‌ڕۆم

له وڵاتێک

شاعیره‌کان،

په‌تی سێداره‌ی وشه‌کان

ئه‌هۆننه‌وه!

نوسه‌ره‌کان،

له‌به‌ر بڵێسه‌ی ئاوری په‌رتوکخانه

ئه‌نوسنه‌وه!

نانیشمه‌وه!       نانیشمه‌وه!

       ٭   ٭    ٭

ده‌ڕۆم ؛ ده‌ڕۆم

کاتێ ئه‌بینم کۆلکه‌زێڕینه

له ده‌وری دوکه‌ڵی گوفه‌کی دراوسێکه‌مان

خۆی با ده‌دا!

نه خۆر، نه بوک، نه باران

نه ڕه‌نگه‌کانی جاران

ئیتر بۆ من مانا ئه‌دا!

   ٭     ٭    ٭

ده‌ڕۆم، ده‌ڕۆم

ئاخر له‌م ده‌ڤه‌ره

بولبوله‌کان سه‌ر ئه‌بڕێن!

په‌پوو، بۆ دیوه‌خان

به پوڵ ئه‌کڕێن!

مێشکه‌کان که‌ڵه‌پچه ئه‌کرێن و

گه‌لحۆ و گه‌ل‌خۆره‌کان، له کۆڵ ئه‌نرێن!

   ٭      ٭      ٭

ده‌ڕۆم،  ده‌ڕۆم

سودی نیه مانه‌وه‌که‌م

له‌م سه‌ر ئه‌رزه

لێره به‌رزایی نزم و

نزمایی به‌رزه!

نامێنمه‌وه! نامێنمه‌وه!

    ٭      ٭     ٭

ده‌ڕۆم، ده‌ڕوم

خه‌فه‌ت مه‌خۆن بۆ هاتنه‌وه‌م

چونکه له‌م ناوه

ئه‌وه‌ی نه‌ماوه، ئه‌و ماوه!

نه‌مری بۆ هه‌رچی نه‌ماوه

خوا حافیز،  خوا حافیز

نایه‌مه‌وه!  نایه‌مه‌وه!

 

شفیع جهانگیری « شیار »

نمایش بیشتر

نوشته های مشابه

دیدگاهتان را بنویسید

نشانی ایمیل شما منتشر نخواهد شد.

دکمه بازگشت به بالا