مەلەوانی بەحری قوڵم چونکە سوبحانیم ئەمن ’
بیم وباکم نیە لە مردن چونکه هەر فانیم ئەمن ’
گەرچی فانیم جاویدانم هەر دەمینم تا ئەبەد’
چونکه سەرخۆشی شەڕابی نەفخی ڕەببانیم ئەمن ’
مەرگو مردن شەهدە بۆمن تازیەم بۆ دا مەنین’
ئارەزومەندی ویسالی فەیزی یەزدانیم ئەمن ’
کەی شەڕابی وەسلی تۆ مایەی هەراسو وەحشەته ’
هەر قومیکم بێ بەسە هاوارە عەتشانیم ئەمن ’
من کە میوانم دەزانم هەر دەڕۆم بۆ غەم بخۆم ’
ئێرە جێی من نیە عەزیزم چونکه ڕوحانیم ئەمن ’
مەقسەدی من عالەمی ئەعلایە یەکسەر دەچمە وێ ’
چیم لە ئەم وێرانه داوە ئەهلی دونیا نیم ئەمن ’
من لە ئەم وێرانەیە هیچ سەبرو ئارامم نیە
عاشقی جەنناتی عەدنو کەوسەر و کانیم ئەمن ’
گەرچی ئەو دونیایە بۆمن مەنزلێکی کاتیە
بایەخی خۆی پێ دەدەم مەغبونی سەودا نیم ئەمن ’
زەڕڕە زەڕڕەی ئەم وجوده زاتی حەق پێشان ئەدا ’
عەینی وەک ئاوێنە وایه پڕبەدڵ ڕوانیم ئەمن ’
وەک شەفەق گەر دەتهەوێ بێ پەردە بڕوانی لە حەق ’
ڕۆژی ڕونه ئاشکرایە دەس بەجێ زانیم ئەمن ’
۲۱/۴/۱۳۷۸ وەزنێ ’ شەفەق