[مافی ئەولاد لەسەر دایک و باوک]
بۆ دایک و بۆ باوک ئەولاد نیعمەتە
گەر ساڵح و پاک بێ بێشک ڕەحمەتە
دایک و بابەکان ئاواتیان وایە
دەپارێنەوە و دەڵێن خودایە
پێمان کەرەم کەی ئەولاد و منداڵ
گەرم و گوڕ بکەی بە منداڵ ناو ماڵ
تا دوای ژیانمان کەسانێک هەبن
وەچە و وەجەخمان فەرامۆش نەبن
بەڵام پێویستە بزانن زۆر چاک
گەر دەیان هەوێ وەچەیەکی پاک
حەقی منداڵیان بەجێ بهێنن
بۆ ئەنجام دانی بیانوو نەهێنن
خۆیان بەرپرسیار بزانن بۆ وان
لێیان حاڵی بێ فەلسەفەی ژیان
هەرچی بکەی تۆ ئەوە دەبینی
خراپە بکەی چاکە نابینی
چەند مافێک هەیە بۆ منداڵەکان
بە جێی بهێنن دایک و باوکەکان
بەرلەدایک بوون حەق و مافێک هەن
دەرحەق بە منداڵ تاکوو ئەدای کەن
هاوسەرێکی پاک هەڵبژێردرێ
داوای نەوەی چاک لە [اللە] بکرێ
دوای منداڵ بوونیش ناوی لێ بنرێ
بەناوێکی خۆش بانگی لێ بکرێ
جوان پەروەردە بێ لەسەر دین و ژین
منداڵت فێر کەی لە زانستی دین
وەک لوقمان حەکیم وەسێتی بکەی
لە ڕاهێنانی هیچ سستی نەکەی
وەسیەتی بکەی هاوبەش دانەنێ
تەنها بۆ خودا سەری دانەوێ
پێی بڵێی ڕۆڵە ڕووت لە خودا بێ
تا خودای یەکتاش ئاگای لە تۆ بێ
گەر شتێکت ویست لە خۆی داوا کە
پشت لە هەموو کەس ڕوولە [اللە] کە
چونکە هەر خوایە قازانجی لایە
لابەری زەرەر ، زاتی [ اللە ] یە
بێجگە لە [اللە] کەس نیە ناجی
ئەو کەسە شێخ بێ یان مامەحاجی
مەلای دوازدە عیلم یان دەستەلات دار
گشتی دەست بەتاڵ لای خوای کردگار
حەڵاڵ و حەرام فێر منداڵت کە
پێی بڵێ لە نوێژ تەمبەڵی مەکە
بەڕۆژوو ببە مانگی ڕەمەزان
عەبدێکی باش بە بۆ خودای سوبحان
خەڵک دەعوەت کە بۆ چاکەکاری
دوریان بخەوە لە لاری و خواری
ببە هەڵگری ئەخلاقی پەسەند
بە ئاکاری جوان دەبی دەوڵەمەند
لەسەر موسیبەت خۆڕاگر ببە
خۆت نەدۆڕێنی ، هەلەشە مەبە
خۆ پێ زل مەبە لەلای دەورووبەر
بە فیزو دەعیە دەکەوێ خەتەر
لە ڕێگا ڕوێشتن مەند و ماقوڵ بە
دەنگ هەڵمەهێنە ، کەسێ عاقڵ بە
ناخۆشترین دەنگ دەنگی گۆدرێژە
داییم چاک بڵێ و خراپ مەیێژە
کاتێ شتت خوارد (بسم اللە) بڵێ
غەیری (بسم اللە) چیدیکە مەڵێ
بەدەستی ڕاستت تەعامێ بخۆ
ئەوەش فەرمانی ڕەسوڵە بۆ تۆ
کاتێ تەواو بووی شوکری [اللە] کە
داوای ڕزقی زۆر هەر لە خودا کە
بزانە چ کەس دەکەی بە هاوڕێت
کەسێکی باشە یان کەسێ سەرشێت
دۆست و ڕەفیقت دەبێ زۆر چاک بن
لەخراپە دوور ، زۆر باش و پاک بن
ڕەفیقی نابار وەک دووپشک و مار
پێوەمان دەدا نە یەک جار ، سەد جار
هاوڕێی باش و چاک بە وێنەی عەترە
عەیبت دەپۆشی هەر وەکو چەترە
لە خۆشی و گرفت هاورێت دەمێنێ
ڕەفیقی خراپ عەمری نەمێنێ
ئاوا بەو جۆرە فێری شتی کەین
بۆ خێر و بێری ڕوو لە [اللە] کەین
لە خودامان بووێ داهاتووی خاس بێ
فەردێکی باش و خودا شناس بێ
هاونەوعێکی باش بۆ دەوروو بەری
بۆ دایک و باوکی وەک داری بەری
یونس سلیمان زادە
ئاوایی قەڵاجۆغە
۱۳۹۸/۱۰/۲۹
