غەم مەخۆ ڕۆژانی ماتەم وابەرەو دوایی دەڕۆن
پاییز و زستانی ماتی ڕوو بە کۆتایی دەڕۆن
گەر گەڵامان هەڵوەری و باڵان ڕەق و ڕووت مایەوە
هەر بەهار دابێ ڕەق و ڕووتی بە خێرایی دەڕۆن
گوڵ بە بەرگی تازەوە ڕووبەند لەسەر ڕووی لادەدا
بولبولی شەیداش بە نارەنار و بای بایی دەڕۆن
ڕۆژی گەرم و عەرزی نەرم و بای شەماڵی ڕازدار
دێنەوە کن‌یەک شەوانی سارد و تەنیایی دەڕۆن
ئەو هەموو فرمێسکە ڕوونەی ئەمن و تۆ هەڵمان وەراند
تێک دەدەن سەددی جودایی چۆن بە خۆڕایی دەڕۆن؟
ڕوی گەشی تۆ موی ڕەشی کردم سپی بە تاو و ئاو
گیای بەهارانیش بە هاوین ڕوو بە سپیایی دەڕۆن
کاری ئێمە گەر بە سستی دەچتە پێش دڵگیر مەبە
هەوری پڕ باران ببینە چۆن بە ئەسپایی دەڕۆن
تا گوڵێک پاراو دەبێ سەت کانی پڕ ئاو پیر دەبن
تا دڵێک غونچەی دەپشکوێ سەت شنەی بایی دەڕۆن
تا دڵی شەمزاوی “شەمزین” و “شەمێ” پێکتر دەگەن
ماڵی “خاڵان” دەبنە تاڵان و گەڕی شایی دەڕۆن
تا “خەزاڵێک” دەس دەدا بۆ “لاسی” نامۆ و هەڵوەدا
عێلی “باڵەکیان” و “خانزاد” بێ سەروپایی دەڕۆن
تا “عەزیز بەگ” سینگی خۆی دەکوتێ و “کەنی” دەرباز دەکا
پیاوی سێ دەوڵەت بەرەو “سابڵاغ” بە دانایی دەڕۆن
تا “خەجێک” “سیامەند” دەبینێ و چاک و چۆنێکی دەکەن
پچک و پەرژین دەبنە دوربین، گەشت و ئاگایی دەڕۆن
تا “سلێمانی” و “هەولێر” دەبنە خاوەن ماڵ و حاڵ
سەد هەزار ماڵ دەبنە “ئەنفال” و بە یەغمایی دەڕۆن
تا “جەلالێک” تاجەلارەی زاڵمەکەی “بەغدا” دەخا
سەت “هەڵەبجە” هەڵدەقرچێن و بە “شیمایی” دەڕۆن
تا “میلۆسۆویچ” و “سەددام” گۆڕبەگۆڕ دەکرێن بە زۆر
سەد هەزار گۆڕی بە کۆمەڵ بێ شناسایی دەڕۆن
تا “حەماس” حەفتا و شەش کورسی لە ڕاپرسی دەبێ
“یاسر” و “یاسین” و “ڕەنتیسی” بە پۆڵایی دەڕۆن
گۆڵوەشێن گەر گوڵ وەشان دەکرێت و گۆی زێڕی لە شان
چون لە مەیدان “زەینەزەیدان” و “زەندی” و “دایی” دەڕۆن
تا کوڕی “یاقوب” لە زیندانی حەسوودان دێتەدەر
هێزی ئەژنۆ و تینی باهۆ و نووری بینایی دەڕۆن
تا “مەم” و “زین” دیدەنێکی کۆشکی “زێندینی” دەکەن
ماڵی “تاژدینی” دەسووتێ و شار بە تێکڕایی دەڕۆن
تا هەژارێکی وەکوو من لەو هەزارە تێدەگا
زۆر بزەی بزوێنەر و زۆر زولفی تاتایی دەڕۆن
ڕەوتی مامزی شاخ لە دەشتێ و گفت و ڕەمزی شار لە دێ
نەمدەزانی خەڵکی لادێ وا بە وریایی دەڕۆن
نەمدەزانی کێلەشین قەندیل شکێنە و کێل‌چەقێن
شێرلەشەڕ بۆیە شپرزەن چون بە تەنیایی دەڕۆن
کێل کە مەندیلی لە خۆهاڵاند ئەمن دیل مامەوە
ڕووت کراوان دەست بە سەر دەبن و بە لاسایی دەڕۆن
من بەهەشتم تاکو ئێستا هەر بە هەستی دڵ دەبەست
تازە وێنەی دێنە بەرچاوم تەماشایی دەڕۆن
پێم دەڵێن: خەنجەر چلۆن کالانی خۆی دەبڕێ بە فێڵ
من دەڵێم: چون خەنجەری چاک ڕوو بە بەرزایی دەڕۆن
ئەو برینەش هەر لەبەر سەرخۆشی و کەم هۆشیە
باز لە تاوی چاوی کەوسەر مەست و شەیدایی دەڕۆن
بۆ “شنۆ” سمکۆی لە داو خست و کەسیش چی پێنەکوت
دیارە ئەو کارانە لێرە زۆر بە ئاسایی دەڕۆن
کەس بە لاباران نەگەییە جێ هەواران پێت بڵێم
هەرچی دەیبینی بە دو قۆڵی و بە دولایی دەڕۆن
چۆن قورینگ و قاز بە ڕۆژ خۆساز دەکەن بۆ شەوڕەوی
دوور لە چاوی بەد لە پاش بولێڵ بە تارمایی دەڕۆن
جا بەرەو ڕوی یەک دەخوێنن بێ ترس لە ڕاو و داو
ڕادەوەستین ئەمن و تۆش تا خەڵکی ئاوایی دەڕۆن
بەحری عیشقی پاک نەهەنگی خۆی دەوێ نەک هەنگەمێش
مەل مەلەی نازانن و ناچار لە تەنکایی دەڕۆن
“چەختی !” خۆشبەختی و سەعادەت لێت نزیکە هەلیەتی
چونکە دەرفەت دەردەفڕن و زۆر بە خێرایی دەڕۆن.
عومەر کاموسی ـ نەورۆزی ۱۳۸۵
