دل نوشتهشعرکوردی

هەر ساڵە و مانگێ و هەر مانگەو یادێ

هەر ساڵە و مانگێ و هەر مانگەو یادێ

پێشکەشە بە ڕۆحی پێغەمبەری ئاشتی‌خواز

سەروەرەکەم، سالارەکەم، سەردارەکەم، ئەی ڕێبەرە نازدارەکەم، لە دایکبووی مانگی سەوزی بەهارەکەم، کەسی دووهەمی نێو غارەکەم.(ثانی اثنین اذ هما فی‌الغار) تاقانە دڵدارەکەم

دیسانەوە هاتوومەتەوە بەرەولات، لە کوردوستانی ڕۆژهەڵات، تا قەبوڵم کەی بە خاک و خاشاکی بەری پات، کوردم بە مێژووێکی سوورخەڵات، هەزاران عارفی وەک مەولەوی، نالی، مەحوی، ناری، مەلا چاکی خاوەن فەقێ و شارەزا بە زانست و پیر و بە بیر و تا دەگاتەوە حوجرە پیرۆزەکەی تۆ و جابان و مەولانا خالید شارەزووری، سوڵتان موزەفەرەددین شای هەولێر و سەلاحەدینم هاتنە جەرگەی خەبات، بە پشتیوانی ئایینە جوانەکەی تۆ، دژ بە تووڕەهات، چاکی پیاوەتیان لێ هەڵکرد، وەک مەرد و گورد، بوونە ئەوەی تۆ دڵت دەیخواست.

نێوانی کوردوستان تا مەدینە، یەکجار زۆرە لە بوواری فیزیکی، بە درێژایی شەوو ڕۆژ، بە بارەتەقای چواردە چەرخ و نیو، بە ڕوناکایی و تاریکی. 

سەیرە!

هێشتا هەر لە هەموو کەس پێگە بەرزتر، خۆشەویست‌تر و لە دڵا نزیکی، 

دەزانم تۆش بەندەی خوای بێ شەریکی، 

بە بڕوای ئێمە تۆ لە تاوان و هەڵە تەریکی،

یادت بۆ موسڵمان هەوێنی شادیە، بەختەوەرییە، 

ترووسکەی هیوای ئازادییە،

 دژی بێدادییە،

 پڕۆسەی دەرچوون لە سەرگەردانییە،

 هچ ژوان و یاد و چاو پێکەوتنێ ئاوانییە،

 ئەگەر دەیانزانی چەندە دڵسۆزی، بە نەزانی خەڵکی دوێنێ و دونیای مۆدێڕنی بێ سەرەوبەرەیی ئەمڕۆدا و لە حیساب و کیتابی پەسڵان و پاڕانەوەی سۆزی، هەر دەیانگوت: کەسی وا چا نییە، ئەوەش دەیکەن و دەیڵێن بێ باوەڕان بە هەموو توانا و زانستێکیانەوە دڵمەند مەبە، سەرپاکی نەزانییە.

مەحموود و ئەحمەد و یاسینت ناوە،

 بە ڕەحمەتەن‌لیلعالەمین ناوت براوە، 

بە (وانک لعلی خلق عظیم) وەسفت کراوە،

 لە ناو عەجەم و عەرەب ناوی ئەمینداریت زڕاوە، 

دۆست و دژمن دەتکەن قاوە، 

لە بووجەهلەکانی زەمان تا ئەبووبەکرو عومەر شایەدیان داوە، کەس وەکی تۆ نەخوڵقاوە، 

جا هێندێک لە ڕووی غورورەوە دۆڕان و هێندێکیش بە ئەقڵ و ئاوەزێ بەرز براوە،

لەم ڕایەڵ و پۆیە سەرم سووڕ دەمێنێ، 

لە کوێستان و گەرمێنێ، ناوت بووتە سەرباشقە و هۆنراوەو پەخشان، سەنا و سکاڵا، هونەر خۆی تیێدا ڕادەدا و بە باشترین شێوە دەڕازێتەوەو خۆی دەنوێنێ، چاوانەی ئیسلام و دین تا دێ لەهەمبەر ئازایەتی و جوامێریت ئاوی ڕوون و گەوارا دەدەڵێنێ، تینویایەتی تامەزڕۆ بەم ڕێبازە هێدی هێدی دەشکێنێ، 

داستانی مرۆڤ‌دۆستانەت دەشتی سەوزی مێژوو دەخوڵقێنێ،

تۆ ئەمیری، تۆ سەفیری

تۆ لایەنگری تاقانەی فەقیری

 بۆ زۆردارو دەسوو پێوەندی کۆت و زنجیری، تۆ دژی هەڵوێستی چەپەڵی کچ کوشتن، ڕشوەخۆری، دڵڕەقی، بێ سەوادی، تۆ بیرمەندی، پسپۆڕی، ژیری

یادت دەکەمەوە یاد، 

هەرچەن قەت نەچووی لەیاد، 

بەڵام بە یادت دڵم دەبێ شاد، 

گرێ کوێرەی چەڵەمەکان دەکرێنەوە بێ ئەوەی دەستی تێدا بێ یەک ئوستاد، 

ڕۆژی گەنجیم بەڕێکردووە، بە شەوی تاریکی تەمەنەوە دێم بەرەو سات و سەودات،

هەڕەمەی هەڕەتی تۆ دۆزینە، 

عەجەب هەوێنێکە بۆماستی مەییوی ئەم ژینە، بۆ هەموو چەقڵ و دڕوویێ پەرژینە، 

هەنگوین و شەکەر چ حەددیان هەیە بگەنە داوێنی ئەم‌شیرینە،

 ئەوانە بە کەرەستەی ئەمڕۆیی دەغەڵییان تێدا دەکرێ، ئەوە تۆی وەک خۆت ماویەتیەوە تا ئێستا یەک بینە، تۆ چی بووی؟ بوویتە جوانترین و ناوازەترین بەرەی مرۆڤ و گوڵی ئەم گوڵزارە ڕەنگینە

هەرچیم کرد ڕێگە چاریێکم نەدۆزینە بۆ بەخزمەت گەیشتنێت لە ماڵ، هومەرەم بردە بەر شابازی تیژڕەوی خەیاڵ، ئەو سنووربەزێنە بۆی گرینگ نیە بەرزایی چیاو قوڵکەی چاڵ، ڕۆحم کردە میوانی خانەخوێی وەک تۆ، هەی بە خۆم و هەموو کەسمەوە لە بەرت مرم بۆ پەزیراییت، بەم نووسراوە کوردیە کەوتمە گڕوگاڵ، هەر هاتن و تریقانەوە بە دەم خامەوە، ڕستە و وشە و پیت و خاڵ 

ئەوان لە خۆم خراپتر کەوتوونە حاڵ 

حاڵمان چ لە باشی دا نییە دنیا پڕبووە لە گەندوو گەڵاش، دەگمەن هەن مەرد و ڕەند، پیاوی باش، قسە قوت و زمان درێژ، وەک ئەوی دیش هەموو پەڕۆیێ پیسن لە بازاڕی بێ برەوی قوماش، 

دزی، جەردەیی، خۆبەزل زانین، ڕشوە خۆری، کۆیلەیی مرۆ بۆ مرۆ، دەسبزوی لە پێش و پاش، خواردنەوە بە ئاشکرا، چەپڵە ڕێزانە بۆ یەرۆکی سەرۆکی بۆش و ناشایست چەپک چەپک پووڵی باهێناو دەکرێتە شاباش، مزگەوت و حوجرە چۆڵ، مەلا و فەقێ بێ ناز، کابارە و تالار و کۆڕی بێ جێ، خانەباغەکان مەسەرەف دەکەن بە بەلاش

کێ وەک تۆ پێشمەرگە بێ، بە خەمی خەڵکەوە مردبێ، 

سەری بەرزی کاتە قۆچی قوربان و لە دڵسۆزیا بێ پەردەبێ، 

لێدەن، ئازاری دەن، هێشتا “اللهم اهدی قومی فانهم لایعلمون”، سەرکردە هەروادەبێ لە ڕوویا چی پیلانە بەر بادەبێ، 

شەوی کۆچت، غاری سەورت چاویان کوێر بوو، دەی موعجیزە هەروادەبێ، 

خۆزگە بەوەی مەستی ئەو بادە بێ، سەرم و شکۆو ترسی لە کەس نابێ

چیبکەم بێمە ئەو دیوانە، بۆ مەڵەمی ئەم دەردانە، ـۆ حەسانەوەی شەوێ بێ خەم لەم هەوارە بێ بوونیانە، 

بۆ لە بەین چوونی زوڵم و زۆری زاڵمان و خوێنڕێژانی لە خوا بێ خەبەر دەستم بە دامانە، چۆن لا دەچێ خەم و ژانی بێ کەسیمان لەم نیشتمانە؟ 

ئەی موحەممەد، 

شاسواری ڕێی سەرفەرازی ئێرەو ئەلانە، شوێنکەتووی تۆین و ئەو قورئانە، 

چاوی چاو پێکەوتنت بە ڕووی خۆش و ڕەزامەندی ئاواتی بەرز و خەونی دوور و درێژمانە،

سا تۆو ئەو هەموو نازداریەت لای خودای سوبحانە، شەفاعەت فەرموو بۆ تاوانە، 

نەک هەر ( ژاکاو)، هەموو کوردێ دڵپاک و بڕوادار ئەو ئاواتەی دەخوازێ لە پێغەمبەری ئاخرزەمانە.

✍ غەفور کەس نەزانی، ژاکاو

5\ 8 \ 1400 هەتاوی

نمایش بیشتر

ســــۆزی میــــحڕاب

سایت ســــۆزی میــــحڕاب در آذرماه 1392 با همت جمعی از اهل قلم خوشنام و گمنام تاسیس شد ســــۆزی میــــحڕاب بدون جنجال و در اوج عملگرایی به ترویج مبانی میانه روی می پردازد ســــۆزی میــــحڕاب با هیچ جریان و هیچ احدی درگیری ندارد ســــۆزی میــــحڕاب رسالتی جز همزیستی و دگرپذیری ندارد

نوشته های مشابه

دیدگاهتان را بنویسید

نشانی ایمیل شما منتشر نخواهد شد.

همچنین ببینید
بستن
دکمه بازگشت به بالا