من بەندەو تۆنا ، به تۆ مەنازو
کەمو کورتیەکێم ، هەر جە تۆ وازو
نامێت (رحمان)ەن، (فرد)و هەم (صمد)
رەحمت فراوان ، کەرەمت بێ حەد
(رحمان) رەحم دار، فەرد تەنیانی
(صمد) بـێ نیاز ، جه ماسیوانــــی
(کریم )یت دائیم، یاگەی نیازەن
بەرەو رەحمەتیت ، هەمیشه وازەن
گر کەسێ تاۆو ، به بێ واسێته
چەنی یانەو تۆ ، ببــۆش رابێته
جە بەرەو یانەیت ، نیەن قاپیەوان
پەی تەفتیش کەردەی ، راویارو مێمان
هەر کەسێ فەقیر ، یا که گەدا بۆ
حەق ئاماێش نەبۆ ، قسه ناڕەوا بۆ
بەڵکەم نزیکــی ، لاو تۆ تەقـوانە
نه کەسێو داران ، جە ئی دۆنیانە
ا*
پەی تۆ هەن ئەوساف ، بێ حەددو شمار
پەی نزیکەۆ بیەیت، بەخشەندەو غەففار
نامێت(ملک)ەن (قُدّوس) و (خــالق)
(غفّار) و (قهّار) وهّاب) و رازق
(ملک)پادشاو ساحێب ئێختیار
(قُدًوس) لایقتەن، حەمدی بێ شمار
(غفّار) وێتەنی ، بەخشەر گوناهان
(قهّار) زەلیل کەر، دەسە و گومراهان
(وهّاب) بەخششت، بێ حەدده و قوسور
(رزّاق) رۆزی دەر، جە ئینسان تا موور
(علیم وقابض) ئاگاو گیان ستان
(سمیع و بصیر) به حاڵ بەندەگان
(حکم)حۆکم کەر،(عدل) عادڵنی
(الخبیر) ئاگای ، نەقس وکامڵنی
(حلیم)ساحێو حێلم ، (عظیم وغفور)
(علــیّ وکــبیر، حفیظ وشــکور)
(جلیل) بامەقام ، (حسیب)حەساۆ کێش
(رقیب) وریانی و ، بی خۆف و ئەندێش
(مٌجیب) قەبوڵ کەر ، دۆعاو عاڵەمی
(واسع) ویسعەت دەر، بێ نەقسوکەمی
(حکیم) کارزان و ،(شهید) ئاگادار
(قوی)قۆدرەتت ، بێ حەددو شمار
(حمید) لایەقتەن ، حەمدو سەنای تام
(مبدء)دروس کەر ، تەمام خاس و عام
(مُعِد)هەر وەعدێۆ ، دانت حەتمیەن
پەی فەناو بەقیا ، (کن) یە کافیەن
(مُصوّر) نەقشــەو ، عاڵەم کێشانت
مێقدارو عومرو ، ژیوای تۆ دانت
ئەوسـافی کەماڵ ، گردش جە لاتەن
گر دەردە دارێ ، مۆحتاج دەواتەن
گەنجو عاڵەمی ، بدەی بە کەسێ
کەسێ مەتاۆو ، کێشـــۆ نەفەسێ
یامەحروم فەزڵت ، کەری هەرکەسێ
کەس نیا پەێش بۆ ، بە فەریاد رەســێ
خودایا : رەحمت ، ئاندە وفـوورەن
بەخشایت بێ حەددو، هەم بێ قوسورەن
باشتەرین کەست ، به خەڵات قۆرئان
رەوانـــه فـەرما ، پــــەی رابـــــەریمان
تا نیشانە دۆ ، شیوەو عێبادەت
جه دەستورو تۆ ، کەرمێ ئیتاعەت
بەڵام من بێ حەد ، نافەرمانیم کەرد
یاســــاو بەندەگیم ، به یاگــێ ناوەرد
پێسەو غەرق بیەی ، کاتو هێلاکی
بیان دەسە دامان ، خارو خاشاکی
گـۆناحێم بیینی ، ئاشــوفتەو حـاڵیـم
جه روێم ســـیاۆتەر ، نامەو ئەعماڵیم
جە تول شەوو رۆی ، زۆر پەی وێم مارو
فــــەریزەو نـمـــای ، به یاگــــــــێ بارو !!
دەسو دیم شۆرو ، فرە به عەجەله
نماێوە وانو ، عـــــــــازا بە پەلە !
یه قینەن کە تۆ ، کەریم تەماشــا
بەڵام من جە وێم ، حاشامەن حاشا
زاهێر پەی لاو تۆم ، ئاماو رجۆحەن
جە سەر بەر ماڵیو ، جیسمێ بێ رۆحەن
دڵ و رۆح ، یا پەی کار و بار دنیای
خەریک و هەوڵەن ، یا بەرەو ریای !
جه مانعای هاڵی ، بێ یادو زکر
بێ زادو تۆشەو ، بێ دەرک و فکر
وێم به شۆن کەوتەو ، قۆرئانی زانو
بەڵام جه مانعاش ، هیچچێ مەزانو !
ئەگەر یۆ واچۆ : پەنەم فڵانـــی
تۆ فڵان حۆکمی ، جە دین مەزانی
پەیش توره بونە، به ئەخلاق تاڵی
مەگەر تۆ کینی؟ من کەری حاڵی!
ا****!
خوایا ئەحتیاجت ، نیەن بە تەعریف
وێت ئاگات هەنە ، جە منــــی زەعیف
دەستوراتو تۆم ، نەکەرد پەیڕەوی !
جه لێو خەڵکینە ، هەرچێ و باۆ نەوی
کردەوەی کەمو ، ئیددەعای زلە !
چەنی و شەیتانی ، بیان دەسە ملە!
بێ زاد گێرتەنم ، راگەو سەفەری
غافڵ جه دوری و ، ئێحساس خەتەری
ا*ا
(غەریب) با وەس بۆ ، ئێقرار بە گونات
پەی لای خـوداوه ند ، بـەرە روی رجات !
هیوات جە دڵ بۆ ، چون خودای رەحمان
قەبوڵە کەرۆ ، داۆا بەندەکان/
به شه رتێۆ تەوبەت ، کەرده بۆ به راس
گــوناعە کانت ، فاڕۆۆوه به خاس
(غه ریب) به دڵ بۆ ، دادو فوغانت
بەشکو خوای گەوره ، بدۆ ئەمانت
مجەره هەرسی ، هەردوێ چەمانت
بەشکەم خوداوەن ، بدۆ ئەما نت
خوایا پەی خاتر ، رەحمی بی هامتات
به دەسی ها لی ، وێم وستەن پەنات
به رەحم و کەرەم ، بەخشه گوناهێم
کوتا مەکەره ، دەس و رجاهیم
نۆخێوەن فەرقو ، رێ و زێ حەیاتم
کڕنەش به رەحمەت ، بـده نـەجــاتــم
هەرچن دەس راسم ، خالی و روم رەشەن
بەڵام بەخشای به ، هەژارای وەشەن
14 / 6 / 1394 هەتاوی-
ئیسماعیل رزائی (غەریب)