شیدا محمودی
پەیامی کورتە پەیجی نەو بەهاران
لە کۆڵمەی گوڵ دەمێکە ماچی باران
مەزەی سەوزی دەچێژی چاوی چەپگەرد
کە سەرمەستی بەهارانن کەژ و هەرد
هەواداری هەوای هەور و برووسکەم
حەریرێک نازخەیاڵێک لێرە چێکەم
چنینی گوڵ لە چێنک و بەرقەدی شاخ
لە نەرمانێ لە مێرگ و مەرقەدی باخ
هەڵۆخێژی لە هەوراز و ڕەوەزدا
هەواری کوردەواری کۆز و پەزدا
بەراتی کاڵ و ئاڵ و ترش و نۆشی
گیاوگۆڵی سەفا و سەیرانی خۆشی
زراڤە بەژنی کەژوانانی کەوشەن
کەوی کوێستانە کیژی جوانی گوڵشەن
شەتاوی مەست و هەڵدێری نەواڵی
شنەی نەرم و شەڕانخێوی شەماڵی
پەسیو و لێڕەواری نیشتمانم
هەوێن و هانه بۆ فەوتان و مانم
شەیدا مەحموودی شنۆ